هل تشعر بالذنب لعدم تحقيق إنجاز في يومك - ماذا عليك أن تفعل؟

في كل ليلة أشعر بالذنب لعدم تحقيق إنجاز في يومي، ولكني ما زلت أضيع فرص الاستفادة من وقتي، وهذا يحبطني جدا. ماذا علي أن أفعل؟

ناس كتير شايفة إن يومها بيعدي من غير ما تعمل أي حاجة مفيدة بحجة إنها مش لاقية حاجة تعملها أو باختصار شايفة إن معندهاش وقت. دول 10 حاجات تقدر تملى بيهم يومك وتحقق أكبر قدر من الإستفادة بحيث تكون راضي عن نفسك:

 10 حاجات تقدر تملى بيهم يومك 

1- قلل من الوقت اللي بتقضيه ع السوشيال ميديا

بدل ما تفضل تتفرج ع فيديوهات وكوميكس ع الفيس بالساعات، خصص ساعة من ضمن الساعات دي تدخل فيها ع مواقع هتفيدك أكتر من الفيس، ادخل اتفرج مثلا ع محاضرة من تيد. ادخل اقرأ مقال من موقع مفيد زي أراجيك وغيره.

وكمان هعمل قائمة كاملة بأسماء مواقع مفيدة تستطيع قراءة مقال واحد يوميا من كل موقع لتغذية عقلك.

2- اكتب

"من يكتب لا يموت" يوسف زيدان

فيه ناس فاكرة الكتابة شيء صعب وإن إنت مينفعش تكتب إلا لو بتفكر في كتابة رواية أو لو إنت أصلا كاتب.. لأ المقصود بالكتابة هنا هي إنك في آخر اليوم تسجل الأحداث واللحظات الحلوة والمواقف اللي حصلت لك. اكتب بأي طريقة تناسبك متقولش لازم فصحى، خليك مرن.

3- انجازاتك

فكرة إنك في أول اليوم تكتب قايمة تحط فيها إنت عايز تعمل إيه في اليوم ده وتيجي آخر اليوم تشطب ع الحاجات اللي إنت عملتها فعلا ده شعور ملوش مثيل، بيحسسك إنك فخور بنفسك حتى لو كان إنجاز بسيط.. جربه.

4- البيئة اللي حواليك

لما تبقى ع الفيس وتلاقي كل البوستس اللي ع الهوم عبارة عن نكد وكآبة وطاقة سلبية واللي عايز يموت واللي بيفكر في الانتحار، يبقى طبيعي جدا تلاقي نفسك تلقائي اتعديت منهم. حاوط نفسك بناس ايجابية ومرحة..

5- اقرأ

القراءة فعلا لو أدركت أهميتها مش هتبطل تقرأ، اقرأ في أي مجال.. القراءة بتوسع عقلك وتخليك عندك رؤية.

6- اشرح وشارك

"إذا لم تستطع أن تشرح فكرتك لطفل عمره 6 أعوام فأنت نفسك لم تفهمها بعد" أينشتاين

لو عايز تثبت معلومة عرفتها جديد، اشرحها للي حواليك.. اكتبها ع الفيس وشاركها مع الناس.

7- جرب

جرب حاجة جديدة معملتهاش قبل كده مهما كانت بسيطة أو غريبة، جدد يومك واعمله ريفريش دايما ودور على عادات جديدة وهوايات إنت معملتهاش قبل كده، الموضوع فيه متعة وسعادة لا توصف.

8- اتعلم لغة

ده شيء مفروغ منه سواء هتتعلمها فقط لمجرد التعليم وإنك تقدر تتكلم مع أجانب أو حتى لو بتتعلمها عشان شغلك ووظيفتك.

9- اقعد مع نفسك

لازم وحتما في وسط الحياه السريعة اللي مش ملاحقين عليها دي، تخصص وقت تقعد فيه مع نفسك وترتاح وتخف من الضغط اللي عليك.. حتى لو عشر دقايق كل يوم. متعملش فيهم حاجة ولا تفكر في حاجة، اقعد بس غمض عينك كده واسترخي.

10- اهتم بصحتك

"الثروة العظمى هي الصحة" شاعر روماني

مش هتعرف تعمل أي إنجاز في حياتك أو شغلك وإنت صحتك مش سليمة وعندك مشاكل في جسمك، اهتم بالرياضة والأكل الصحي.